Шlу тлъэгъурэ Адыгэ Республикэр загъэпсыгъэр непэ илъэс 35-рэ мэхъу. Илъэсэу блэкlыгъэхэм республикэм хэхъоныгъэ инхэр ышlыгъэх. Шъолъырым иэкономикэ нахь зэтеуцуагъ, социальнэ мэхьанэ зиlэ лъэныкъуабэ гъэцэкlагъэ хъугъэ, къэралыгъо фэlо-фашlэхэр илъэс къэс нахь lэрыфэгъу мэхъух, къалэхэм ыкlи псэупlэхэм цlыфхэм ящыlэныгъэ нахь зэтегъэпсыхьагъэ щыхъуным дэлажьэх.
Урысыем и Президент, къэралыгъом и Правительствэ яlэпыlэгъу ишlуагъэкlэ мэхьанэ ин зиlэ проектхэр щыlэныгъэм илъэныкъо шъхьаlэхэм ащытэгъэцакlэх: гъогухэм яшlын щыублагъэу промышленнэ ыкlи зекlо кластерхэм анэсыжьэу. Республикэм ипсэупlэ пэпчъ цlыфхэм ящыlэкlэ-псэукlэ зэфэдэу щызэтегъэпсыхьэгъэным, lофшlэпlэ чlыпlэхэр, кlэлэцlыкlухэм гъэсэныгъэ-пlуныгъэ дэгъу агъотыным пае амалхэр щыlэнхэм тишъыпкъэу тадэлажьэ.
Хэхъоныгъэшlухэр тшlынхэм лъапсэ афэхъурэр - Адыгеим щыпсэурэ цlыф лъэпкъ зэфэшъхьафхэм, дин зэмылlэужыгъохэр зылэжьыхэрэм мамырныгъэрэ зэгурlоныгъэрэ азфагу зэрилъыр, тицlыфхэм агу етыгъэу lоф зэрашlэрэр ары. Сыд фэдэ ушэтыпlэхэр тапэ къэкlыгъэми, тызэгъусэу ахэм тапхырыкlышъущт!
Зыкlыныгъэм, зэкъотныгъэм акlуачlэ пандемием иуахътэ зэхэтшlагъэ, гуфакlохэм фэдэ пчъагъэкlэ ахэхъуагъэу цlыф къызэрыкlохэр общественнэ lофышlэхэм, сатыушlыхэм аготхэу къин хэфагъэхэм адэlэпыlэщтыгъэх. Непи Тыгъэкъохьапlэм икъэралхэм яунашъохэр пхырагъэкlынхэу ыуж итых нахь мышlэми, тицlыфхэр Апшъэрэ Унэшъошlым ыкlи Урысыем идзэ къоуцуагъэхэу, тидзэкlолlыхэу Урысыем ишъхьафитныгъэрэ ищынэгъончъагъэрэ хэушъхьафыкlыгъэ дзэ операцием щыlэхэу фэбанэхэрэм lэпыlэгъу афэхъух.
Тапэкlэ пшъэрылъ инхэм ягъэцэкlэн къытпыщылъ. Лlэужэу блэкlыгъэхэм ягъэхъэгъэшlухэр тиlэубытыпlэу, ахэм яlофшlагъэхэм лъытэныгъэ афэтшlызэ, адыгэ лъэпкъым итарихъ, икультурэ бай тыухъумэзэ ыпэкlэ тылъыкlотэщт. Непэ фэдэ мэфэ шlагъом Республикэм щыпсэухэрэм зэкlэми псауныгъэ пытэ, гушlуагъо яlэнэу, Адыгеир, тикъэралыгъо инэу Урысыер ыпэкlэ лъызгъэкlотэщт хэхъоныгъэшlухэр ашlынэу сафэлъаlо!
Джэрпэджэь
Facebook 
Twitter 
Pinterest 
Linkedin 
Tumblr 
vk 
Odnoklassniki 
Reddit 
Whatsapp
Google Bookmarks
